• २०७७ कार्तिक ९ गते आइतवार

’फाट्यो नि माइतीको चिनो – फाट्यो पछ्यौरीको कुना’

फाट्यो नि माइतीको चिनो
फाट्यो पछ्यौरीको कुना’

नेपालीमा एउटा उखान छ– माइतीको भनेपछि कुकुर पनि प्यारो ! यसको तात्पर्य हो जन्मघर र जन्मघरसँग जोडिएका हरेक कुरासँग नारीको स्नेह हुन्छ । दुई दशकअघिको समय, जतिबेला सञ्चार र यातयातको पहुँचमा सहजता थिएन । त्यतिबेला विवाहित छोरी न चाहेको समय माइत जान पाउँथिन्, न महिनौं पुग्दासम्म बा–आमासँग स्नेह साट्न पाउँथिन् । एउटी नारीको यो बाध्यात्मक अवस्था त्यो समय त थियो नै । तर, अहिले पनि उस्तै छ आम नारीको यो बाध्यात्मक अवस्था ।

गायिका आस्था राउतको आवाज रहेको ‘फाट्यो नि माइतीको चिनो’ले एउटी महिलाको माइतीसँगको सम्बन्धबारे मात्र बोल्दैन, एक्ली नारीले भोग्ने गरेको दुर्व्यवहार र उनको मनोदशाबारे उत्खनन् गरेको छ ।

सुरेश अधिकारीको शब्द/संगीत रहेको गीतलाई दृश्यमा उतारेका छन् शान थापाले । दृश्यमा कलाकार दिया मास्केको जीवन्त अभिनयले एउटी दुःखी नारीको चरित्रलाई यथार्थ चित्रण गरेको छ । ‘केही गीत मनको कलेजी मै बस्छन । यी साधारण हुन्छन्, साधारण जीवनकै दुःखसुख ,उकालीओराली भित्रबाट नै जन्मन्छन् र हुर्कन्छन्,’ दिया भन्छिन्, ‘‘फाट्यो माइतीको चिनोले’ मलाई उतै गाउँघरको परिवेश र चेलीबेटीको दैनिकीसँग जोडेको छ ।’

संगीतका विकृति/विसंगतीमाथि सधैँ खरो टिप्पणी राख्दै आइरहेकी आस्थाले महिलाको वेदना पोख्ने गीत तीजको उपहार स्वरुप ल्याएको बताइन् । ‘यो गीतमार्फत बुवा तथा दाजुभाईहरुले आफ्नो चेलीहरुको मनोभावनालाई अझै नजिकबाट बुझ्न र चिन्न सक्नुहुनेछ भन्ने अपेक्षा राखेको छु,’ उनले भनेकी छिन् ।

प्रकाशित मिति: Aug 15, 2020 10:00:42
प्रतिक्रिया दिनुहोस